زوجة حاتم عمور مريضة

صورة حاتم عمور تجدها في كل مكان تصادفها في اليوم 7000 مرة، وكأننا أمام حالة خارقة للعادة..
زوجة حاتم - شافاها الله- ليست أول امرأة أصيبت بالسرطان، أصيبت نساء كثر قبلها و كتب لهن الشفاء، وحاتم عمور ليس أول رجل يقف مع زوجته في محنتها ويساندها في مرضها.

الحب الحقيقي والوفاء الخالص، هو الذي تلامسه في مستشفيات الرباط، اللتي يأتي اليها الناس من المغرب كاملا، وكاتلقا وحدة بعيدة على مدينتها بمئات الكيلومترات فرضو عليها ضعف التجهيزات الطبية فمدينتها أنها تتعالج فالرباط، وتاتلقا داك الزوج الفقير والمسكين كيدوز الفترة اللي ناعسة فيها مراتو فالسبيطار بين الكيران.. خصو يبقا مقابل مراتو وفنفس الوقت خصو يرجع مرة مرة يطل على ولادو ويجيب لمرتو داكشي اللي بغات، وإلا دزتي بالليل حدا شي سبيطار كبير فالرباط، غاتلقا شحال من واحد كينعس الليل غير فديك الجردة المقابلة للمستشفى حيت جا مع مرتو من مدينة بعيدة وحالتو المادية ماكاتسمحش ليه يبات فالفنادق، وهادشي بلا مانهضرو على التضحية المادية، وأقسم أنني كانعرف رجل خدم حياتو كاملة باش يمتلك دار، وملي مرضات مراتو مرض خايب باع الدار باش يعالجها ورجعو سكنو فديور الكرا وهادشي عادي.. سيرو للسبيطارات وغاتلقاو رجال غارقين فالبؤس والمشاكل والفقر، والهم الوحيد ديالهم فديك اللحظة هو زوجاتهم يتعالجو ويوليو بيخير وعلى خير.. وحتى اللي كيعرف شي طبيب ولا طبيبة، سولوهم حيت كيشوفو هادشي بعينيهم..

بالنسبة ليا هاد الناس اللي هضرت عليهم، هوما المعدن الصافي اللي نضرب بيهم المثال فالتضحية والحب والوفاء، أما واحد جاب طاقم تصوير محترف وديكور خاص وملابس خاصة باش يتصور هو ومراتو المصابة بالسرطان، أنا شفتها بمثابة استغلالها باش يظهر فالواجهة، وهاد الواجهة هي اللي كيخدمو عليها دائما مشاهير الغناء والتمثيل.. حيت هي اللي تاتخلي عروض العمل تنهال عليهم باستمرار.. وشخصيا ماعمرني تأثرت بالصورة الوردية اللي كيصدروها مشاهير المغرب والعالم حول علاقاتهم العاطفية، حيت عند أول سوء تفاهم، كينوض هو وهي يتراشقو فوسائل الإعلام، ويتبادلو بيناتهم الفضائح والأسرار..

من لا يخلدون ممارساتهم التلقائية والصادقة بالصور، أكثر وفاءً ممن يستخدمون الأداة الإعلامية ليروجوا لأسمائهم على حساب معاناة الآخرين.. شفى الله كل مرضى العالم.